Mas dako, mas bongga nga 25th Ornopia Motocross Cup

CEBU, Philippines — Agi'g pagsaulog sa ika-25 nilang anibersaryo, ang tinamod nga Sugbuanong sportsman nga si Lou Ornopia nagluto og mas dako ug mas bongga nga karera sa motocross duha ka bulan gikan karon didto sa MS Motosuit Motorsports Park sa Barangay Calambua, lungsod sa San Remigio amihanang bahin sa Sugbo.

Uban niining katuyoan, ang 25th Ornopia Cup nga gipaluyohan sa MS Motosuit karong Abril 14 masaaron nga usa sa labing nindot ug kulbahinam nga mga pasundayag sa kasaysayan sa Cebu motocross.

"Ato gyud ni panindoton kay ika-25 ka tuig ni nga kasumaran sa atong way puas nga pagpahigayon og motocross dinhi sa Sugbo. Proud kaayo ta nga naka-abot ta ani nga milestone ilabi na kay way laing nakahimo niini dinhi kita ra gyud," matud pa ni Ornopia, ang big boss sa MS Motosuit nga maoy nag-establisar sa labing dugay nga aksiyon sa motocross dinhi sa Sugbo niadtong 1997.

Sa paglabay sa mga katuigan, ang Ornopia Cup nahimong hulmahanan sa pipila sa labing tang-an nga mga riders sa nasud nga nanghawod sab bisan sa langyawng lapyahan sama nilang Pepo ug Popeye Rubi, Irwin Uypitching, Jon-jon Adlawan, Bornok Mangosong, Donkey Sanchez, Jubenile Abellar, John Flores, BJ Pepito ug uban pa.

"Daghan-daghan sab ta na-produce nga dekalibreng mga riders nga nakahimo og pangan sa Philippine racing circuit and also abroad. Ato ni silang garbo mao na nga mohatag sab ta og pasidungog alang sa 25 MS Motosuit Racing Greats aron mas mahinungdanon ang umaabot nato nga kalihukan," dason pa ni Ornopia, ang giyukboan nga "amahan sa Cebu motocross".

Sa dili hitupngan niyang natampo ug dedikasyon pagpalambo sa motocross, si Ornopia kanhi gipasidunggan nga "Sportsman of the Year" sa prestihiyosong Sportswriters Association of Cebu (SAC). Usa sab siya ka TOCA  (The Outstanding Cebuano Award) awardee.

Gawas sa ganting salapi, si Ornopia nagkanayon nga duna pa silay daghang nga mga giveaways ug maanindot nga mga premyo sa raffle dili lamang alang sa mga partisipante apan hasta sab sa mga fans. "Akong seguradoon nga dili lamang kulbahinam ug makalingaw ang atong kompetisyon, dunay sab tay mga pakulo ug daghan ta og premyo nga ipanghatag dili lamang sa mga riders nga moapil apan hasta sab sa mga manan-away. Gusto nako nga malipay ang tanan, magmabulokon ug dili mahikalimtan kining espesyal nato nga lumba," padayon pa ni Ornopia.

Si Ornopia mipadayag nga ang kalamposan sa umaabot nilang kalihukan magsilbe niyang sukaranan sa iyang plano nga buhion ang MS Motosuit race series. 

"Usa gyud na sa atong plano kay daghan na kaayo ang nag-agni nako nga ibalik atong race series. Hopefully, ato nang mabuhat karong tuiga uban ang tabang ug suporta sa tanan," panapos pa ni Ornopia.