Beermen kampiyon sa Commissioner's Cup

Milangkat sa ika-29 nga korona sa PBA

CEBU, Philippines — Ang San Miguel Beermen milusad og dalaygong opensiba sa naghinapos nga bahin sa duwa aron pakagingon ang Magnolia Hotshots, 104-102, sa Game 6 sa ilang best-of-seven finals ug langkataton ang kampiyonato sa PBA Commissioner's Cup niadtong Miyerkules sa gabii didto sa Smart Araneta Coliseum sa Quezon City.

Gihuman sa Beermen ang serye sa baraha nga 4-2 aron birahon ang ika-29 nilang korona nga maoy labing daghan sa kasaysayan sa labing unang propesyonal nga liga sa Asa.

Ang Beermen naggukod sa halos tibuok nga bahin sa duwa ug alkansi pa gani og nuybes puntos, 86-95, sa pinal nga 4:51 sa aksiyon, apan mihimo og usa ka impresibong pagbalitok ubos sa pagpangu ni CJ Perez nga nalaimitahan ngadto lamang sa kuwatro puntos sa nag-unang duha ka kuwarter apan mibomba og 24 puntos sa second half.

Si Perez mitapos uban ang 28 puntos api niini ang krusyal niyang tres nga nakapalabaw sa Beermen sa hingpit, 103-99, sa nahibilin nga 48.7 segundos.

Tungod sa iyang pagkamayanihon, si Perez maoy gibayaw nga Finals MVP.

Si Bennie Boatwright miamot og 19 puntos, 13 ka rebounds, ug walo ka assists alang sa Beermen nga misakmit sa ikalima nilang Commissioner's Cup title ug ika-19 sa kinatibuk-an sa mga torneyo nga dunay imports.

Ang Sugbuanong higante nga si June Mar Fajardo gikan sa lungsod sa Pinamungajan mikuha sab og atensiyon uban ang 19 puntos ug 12 ka rebounds ingon man sila si Jericho Cruz ug Don Trollano nga nagkumboya'g 22 puntos.

Nagmaya sab ang head coach nilang si Jorge Gallent nga nakampiyon dayon sa labing una niyang pagtaak sa finals uban sa Beermen.