Sa iyang pagbalik sa Brooklyn durant misidlak uban sa Suns
CEBU, Philippines — Si Kevin Durant mikadlit og 33 puntos aron pangulohan ang Phoenix ngadto sa 136-120 nga kadaogan batok sa Brooklyn sa labing una niyang duwa sa kanhi niya tugkaran sukad sa blockbuster trade nga naghatud kaniya gikan sa Nets ngadto sa Suns sa miaging season.
Nakadawat si Durant og mainit nga pagdawat sa iyang pagtaak og balik sa Brooklyn ug gi-abibahan pa gani siya sa mga fans sa dihang pormal nga gitawag sa iyang pangan dungan ang pagpakita sa usa ka pre-game video agig pagtamod kaniya. Gi-bohan hinoon si Durant sa kadugayan sa mga fans sa Nets nga dismayado sa dihang nakita nga pildihonon na ang ilang team sa bisitang Suns. Gawas sa eksplosibo niyang opensa, si Durant mipasada sab og walo ka assists.
Nakakuha siya og dakong suporta gikan nilang Jusuf Nurkic ug Devin Booker nga nagkumboya'g 50 puntos alang sa Suns. Didto sa Oklahoma City, si Shai Gilgeous-Alexander mipupo og 34 puntos aron ituboy ang Thunder ngadto sa 105-100 nga pagpiog sa defending champion Denver Nuggets.
Samtang ang Minnesota Timberwolves mipayaka sa Dallas Mavericks, 121-87, ubos sa pagpangu ni Karl-Anthony Towns nga mipauhagay og 29 puntos. Wala sab magpa-alkansi ang Los Angeles Clippers nga bisan og wala si Paul George mipakaging sa Washington Wizards,125-109.
Sa ubang mga resulta, ang Cleveland Cavaliers mibuntog sa Detroit Pistons, 128-121, samtang ang Miami Heat miputol sa pito ka sagunson nilang pilde human gibugha ang Sacramento Kings, 115-106.
- Latest