GSI, Donling automatic miabante sa semifinals

CEBU, Philippines — Nakuha sa Goutsource Solution International (GSI) ug sa Donling Aircon and Refrigeration Services ang otomatik nga luna sa semifinals sa Donling Cup 2024 sa managlahing paagi niadtong Domingo diha sa Ateneo de Cebu old campus sa Mango Avenue, Cebu City.

Ang Donling wala mahago paglangkat sa unang lingkoranan sa semis dihang na- forfeit ang walay daug-daog nga Bucket Blazers nga nanamilit bitbit ang 0-9 nga baraha ning maong liga nga giorganisar sa Brothers Ball League sa pagpangulo sa presidente niining si Marvin Sillar.

Lahi ang GSI, niduwa pa kini sud sa 20 minutos ug nidaog batok sa Cebu Grand Prix, 76-73. Ang GSI otomatik sab miabante sa semis isip No. 1 sa eliminasyon.

Ligas kaayo ang duwa gikan pagsugod hangtod sa fourth diin nagpulipuli kini'g labaw. Misamot pa gyud kakulbahinam ang duwa dihang nagtabla ang iskor, 69-all sa nahabiling 5:20 sa fourth quarter.

Daw misihag ang daog sa GSI human kini niposte og 76-73 nga bentaha sa katapusang 1:30 sa duwa. Gihatagan unta ang Cebu Grand Prix nga makatabla ug mahatod ang duwa sa overtime, apan ang 3-pointer ni Lucky Mendoza wala masulod.

Ang best player nga si Dan Cardenas ang nangu sa GSI pinaagi sa iyang makabungog nga 30 puntos uban ang lima ka rebounds ug unom ka assists. Si Ernie Inocencio mitampo'g 14 puntos sa GSI ni team manager Ivan Llesol.

Ang Cebu Grand Prix ni Errol Mendoza gipangulohan ni Roldan Daug sa iyang 21 puntos, gisundan ni Lucky Mendoza nga dunay 20 puntos.