New Era sud quartefinals sa Donling Cup 2024
CEBU, Philippines — Miagi pa og overtime ang New Era una nila maangkon ang kutas nga daog batok sa CJL Sniper, 73-68 sa Donling Cup 2024 niadtong Domingo diha sa Ateneo de Cebu old campus sa Mango Avenue, Cebu City.
Ang daog maoy nagtukmod sa New Era ngadto sa quarterfinals round. Ang duha parehong nagbitbit og 3-5 win-loss records, apan ang New Era maoy miabante sa quarterfinals kay napilde man nila ang CJL Sniper.
Si John Ray Formentera ang nangu ug best player of the game pinaagi sa iyang 20 puntos, pito ka rebounds ug walo ka assists. Sila si Francis Mateo ug Klent Mark Daug parehong miamot og 15 puntos, samtang si Kleven Formentera nitampo'g 10 puntos sa New Era ni team manager Chris Ivan Batitay. Ang natagak nga CJL Sniper ni James Lapinig gipangulohan ni Nico Cojo nga mikadlit og 19 puntos, lakip na ang iyang baseline jump shot sa nahabiling 15 segundos nga nitabla sa iskor, 65-all, gisundan ni Ronald Vargas sa iyang 13 puntos ug Jade Nepomuceno nga dunay 12 puntos.
Makuha unta sa New Era ang sayong kadaogan dihang ila ang bola sa katapusang 10 segundos, apan si Kleven Formentera nasipyat sa iyang drive nga nakapwersa sa overtime. Sa dugang singko minutos wala na makarekober ang Sniper human bombahi og tres ni Francis Mateo alang sa ilang 71-68 nge bentaha.
Sa unang duwa, ang JMD Automotive ni Gerald Dilao milubong sa JLT Sorbeteros ni Jack Leonard Tagacanao sa iskor, 75-50.
Si Jerico Rosales mihimo'g double-double sa iyang 21 puntos, 11 ka rebounds uban ang tulo ka assists aron mangulo sa opensa sa JMD ingon man best player of the game. Si Dexter Maru mikulit og 14 puntos ug si Kevin Pepito mipatik og 13 puntos sa JMD.
Nangulo sa JLT Sorbeteros mao silang Charly Oca ada ug Romnick Romo nga miposa'g 19 puntos matag usa. Bisan pa sa kapildihan, ang JLT sud gihapon sa quarterfinals ning maong liga nga giorganisar sa Brothers Ball League sa pagpangulo ni Marvin Sillar.
- Latest
