Sinulog Cup 2024: Mga out-of-town teams mihimo'g kasikas
CEBU, Philippines — Ang tanang upat ka out-of-town teams mikuha og atensiyon atol sa pagsugod sa Sinulog Cup 2024 Basketball Tournament niadtong Martes didto sa Cebu City Sports Institute (CCSI) gym sa Barangay Sawang Calero.
Unang nagsaba-saba ang United Negros Basketball League (UNBL) All-Stars sa Bacolod City human gipakuratan niini ang defending champion EGS, 74-60.
Ang mga bisita gikan sa Leyte mihimo sab og kasikas sa dihang gipiog ang tagsa-tagsa nila ka kontra nga mga college teams sa managlahi nga paagi. Hapsay ang dalan sa OCCCI Sheermasters sa Ormoc City ngadto sa 97-77 nilang demolisyon sa Cebu Roosevelt Memorial Colleges (CRMC) Mustangs, 97-77, samtang ang Team Khalifa sa Tacloban City nag-agi usa og overtime time sa wala pa pakganga ang University of Cebu (UC) Webmasters, 108-99.
Sa laing bahin, ang Z'Nars Jewelry sa Marawi City, Lanao del Sur nagparamdam sab sa ilang presensiya human mibangon gikan sa 64-71 nga alkansi sa ikatulong kuwarter dayon na ngadto sa pagpayaka sa Chase Tower Runs, 93-86.
- Latest
