Nuggets gipatilaw og pilde ang Celtics xsa ilang korte

CEBU, Philippines — Ang Denver Nuggets mipahinumdum sa ilang mga karibal nga sila maoy defending champion.  Kini human ilang gipatilaw ang Boston Celtics sa labing una niining pilde didto sa ilang korte ning NBA season.

Sila si Nikola Jokic ug Jamal Murray nagkumbinar og 69 puntos sa dihang gitumba sa Nuggets ang Celtics, 102-100, kagahapon didto sa TD Garden.

Tungod niini, giputol sa Nuggets ang 20 ka sagunson nga daog sa Celtics didto sa ilang balwarti. Si Jokic mitapos uban ang 34 puntos, 12 ka rebounds ug siyam ka assists samtang si Murray miharos og 35 puntos alang sa Nuggets scoring, nga nagtangag na karon og 29-14 rekord.

Si Derrick White mikadlit og 24 puntos samtang sila si Jayson Tatum ug Kristaps Porzingis nagkumbinar og 43 puntos alang sa Celtics nga bisan og naparot nag-una gihapon sa Eastern Conference bitbit ang 32-10 nga baraha.

Sa laing duwa, si Devin Booker mipatuasik og 52 puntos samtang si Kevin Durant miduhang og 26 puntos sa dihang gipayaka sa Phoenix Suns ang New Orleans Pelicans, 123-109.

Sa ubang mga resulta, ang Brooklyn Nets milampaso sa Los Angeles Lakers, 130-112, samtang ang Philadelphia mibugha sa Orlando Magic, 124-109. (BANAT NEWS)