Webmasters, Mustangs abante sa Sinulog Cup main tournament

CEBU, Philippines — Ang University of Cebu (UC) Webmasters ug ang Cebu Roosevelt Memorial Colleges (CRMC) Mustangs miangkon og luna sa Sinulog Cup 2024 Basketball Tournament nga gikatakda karong Enero 23-27 didto sa Cebu City Sports Institute (CCSI) gym sa Barangay Sawang Calero.

Kini human ang Webmasters ug Mustangs nanghawod sa upat ka adlaw nga qualifying round nga gipahigayon niadtong Enero 16-19 diin unom ka teams gikan sa Cebu Schools Athletic Foundation, Inc. (CESAFI) ang mipakita'g aksiyon.

Sila si Steven Ursal ug Ricofer Sordilla nangu sa balanseng ataki uban ang 10 puntos matag usa sa dihang gilampornas sa Webmasters ang University of San Jose-Recoletos (USJ-R) Jaguars, 82-59, samtang sila si Redjhee Recimiento ug Josiah Roa parehong mitali og 13 points sa dihang giusban sa Mustangs ang Southwestern University (SWU)-Phinma Cobras, 70-60.

Sa Sinulog Cup, ang Webmasters ug ang Mustangs makigharong batok sa tang-an nga mga commercial ballclubs sa Visayas ug Mindanao region.

Ang Webmasters mobanat sa Bracket A uban sa defending champion EGS, Team Khalifa sa Tacloban City, ug United Negros Basketball League (UNBL) of Bacolod City.

Samtang ang Mustangs mowadwad sa Bracket B batok sa Chase Tower Runs ni Chase Cokaliong, OCCCI-Ormoc Sheermasters, ug Znars Jewerly sa Marawi City, Lanao del Sur.   Miduwa sila ubos sa single round robin format diin ang top 2 matag bracket mo-abante sa crossover semifinals. Ang mga mananaog magsangka dayon sa tinagakay nga duwa alang sa titulo.

Ang makampiyon mobulsa og P150,000. Ang mopahiluna sa ikaduhang dapit makadawat og P100,000, samtang ang malandig sa ikatulo ug ikaupat nga  puwesto mokubra og P50,000 ug P25,000.