Gavens nakatodas na gyud daog sa Donling Cup 2024

CEBU, Philippines — Wala na'y angay ikauwaw pa ang Gavens Water Refilling Station kay nakatodas na kini'g daog dihang ilang gilumsan ang Bucket Blazers, 65-43 sa gubat sa nagbitay nga mga koponan sa Donling Cup 2024 niadtong Domingo diha sa Ateneo de Cebu old campus sa Mango Avenue, Cebu City.

Ang best player nga si Pedro Villarosa ang nangu sa opensa sa Gavens human mikandos og 20 puntos uban ang unom ka rebounds ug duha ka assists.

Si Ariel Pregon mihabwa og 18 puntos, samtang si Mike Alburo mihaw-as og 13 puntos sa Gavens ni team manager Kevin Mamac nga ikasiyam sa standing sa ilang 1-6 win-loss record.

Gipangulohan sab ni Even Dinoy ang Bucket Blazers pinaagi sa iyang 15 puntos, gisundan ni Gilbert delos Reyes nga dunay 12 puntos.

Ang Bucket Blazers ni Chyrus Blen mao na lang ang usa sa 10 ka teams ang wala pa katilaw og daog sa liga nga gipadagan sa Brothers Ball League ubos sa pagpangulo ni Marvin Sillar. Ang Gavens nagbitbit sila og 0-7 nga baraha.

Sa sayo pa, ang Donling Aircon and Refrigeration Services padayong mihakot og daog pinaagi sa pagpilde sa JLT Sorbeteros, 69-60.

Ang JLT miposte og 10-0 sa sayong bahin sa unang kuwarter sa kombinasyon nilang Charly Oca ada ug Jeremiah Rivera, apan nausab ang dagan sa duwa sa second period diin nailog sa Donling ang labaw, 29-25 sa paningkamot ni Megume Bacus. Gikan niadto kontrolado na sa Donling ang nahabiling mga gutlo sa duwa.

Si Bacus maoy topscorer sa Donling ug best player of the game pinaagi sa iyang 22 points, 5 rebounds ug 7 assists. Ang Donling ni Don Quilaton nakakuha sab og igong suporta gikan nilang Jessie Sanchez ug James Carl Lumoya nga parehong mikabkab og 10 puntos alang sa ilang 6-1 record.

Ang JLT ni Jack Leonard Tagacanao gipangulohan ni Fritz Enriquez nga mirehistro'g 15 puntos, gisundan ni  Oca ada nga adunay 14 puntos, Joshua Banaag sa iyang 12 puntos ug JJ Vestra nga may 11 puntos.