Sinulog Cup 2024 kasado na
CEBU, Philippines — Andam na ang tanan alang sa giatngan nga Sinulog Cup 2024 Basketball Tournament nga gitakda karong Enero 23-27 didto sa Cebu Coliseum.
Apan sa dili pa ang sentrong aksiyon, si league commissioner Atty. Jave Mike Aton nagkanayon nga dunay ipahigayong qualifying event nga pagasalmotan sa walo ka collegiate teams gikan sa Cebu Schools Athletic Foundation, Inc. (CESAFI) karong Enero 16-19.
Kini mao ang University of Cebu (UC) Webmasters, University of San Carlos (USC) Warriors, University of San Jose-Recoletos (USJ-R) Jaguars, University of Southern Philippines Foundation (USPF) Panthers, Southwestern University (SWU)-Phinma Cobras, University of the Philippines (UP)-Cebu Fighting Maroons, Benedicto College Cheetahs, ug Cebu Roosevelt Memorial Colleges (CRMC) Mustangs.
Gawas nga makadawat og insentibo, ang top 2 teams mo-abante sab sa tournament proper diin ilang sangkaon ang unom ka commercial ballclubs nga gipangulohan sa defending champion EGS ni Wilson Bas Villanueva.
Mopakita sab og aksiyon sa upat ka adlaw nga pinaksitay sa korte nga kabahin sa selebrayon sa Sinulog festivities mao ang Chase Tower Runs ni Chase Cokaliong nga pangulohan ni Dondon Hontiveros,Team Khalifa Leyte, OCCCI-Ormoc Sheermasters, KSB Glass sa Iligan City, ug United Negros Basketball League (UNBL) sa Bacolod City.
Magbugno sila alang sa P150,000 nga ganti sa makampiyon. Ang first runner-up mobulsa og P100,000, samtang ang mopahiluna sa ikatulo ug ikaupat nga dapit mokubra og P50,000 ug P25,000.
- Latest
