Donling, JLT gipakaging ilang kontra
CEBU, Philippines — Gipakaging sa Donling Aircon and Refrigeration Services ug sa JLT Sorbeteros ang ilang tagsa-tagsa nga kaatbang sa pagbalik sa aksyon sa Donling Cup 2024.
Ang Donling mitunaw sa JMD Automotive sa iskor nga 64-52, samtang ang JLT mipahubas sa Gavens Water Refilling Station, 55-41 niadtong Domingo diha sa Ateneo de Cebu old campus covered court sa Mango Avenue, Cebu City.
Upat ka Donling players ang mipatik og double figures sa pagpangulo sa best player nga si Winsley Oftana, kinsa mirehistro'g 17 puntos, siyam ka rebounds ug upat ka assists.
Higpit kaayo ang duwa gikan sa pagsugod hangtod sa fourth quarter ug diha na misugod og distansya ang Donling sa nahabiling 6:20 sa final period dihang mi-rally sila pinaagi sa troyka ni Oftana ug sa combo guard nga silang Megume Bacus ug James Carl Lumoya nga migamit sa ilang paspas nga duwa.
Si Bacus miamot og 12 puntos, samtang sila si Lumoya ug Ace Despi nag-amotay og 10 puntos sa team ni Don Quilaton nga nagbitbit na'g 5-1 nga baraha, Ang JMD ni Gerald Dilao gipangulohan ni Alain Tarona nga miposte'g 16 puntos, gisundan ni Ferdinand Tiro nga dunay 12 puntos.
Sa pikas bahin, si JJ Vestra mikadlit og 18 puntos uban ang lima ka rebounds ug upat ka assists aron mangu sa opensa sa JLT ug ingon man ilhon nga best player of the game. Si Joshua mikabkab og 15 puntos sa JLT ni Jack Leonard Tagacanao nga duna na'y 5-2 record.
Ang Gavens gipangulohan ni Justine Sembrano sa iyang 16 puntos, samtang si Eric Sanchez mitampo'g 10 puntos sa koponan ni Kevin Mamac nga bokya pa gihapon sa unom ka duwa sa maong liga nga giorganisar sa Brothers Ball League ubos sa liderato sa presidente niining si Marvin Sillar.
- Latest
