Celtics 16-0 na didto sa ilang korte

CEBU, Philippines —  Padayong miratsada ang Boston Celtics didto sa ilang korte.

Ang labing uwahi nilang biktima mao ang Toronto Raptors nga ilang gipakaging, 120-118, sa NBA kagahapon didto sa TD Garden sa Boston, Massachusetts.

Si Jaylen Brown mipabuto og 31 puntos alang sa Celtics, nga 16-0 na didto sa ilang balwarti.

Nakatabla unta ang Raptors, 116-116, human sa 3-pointer ni Scottie Barnes sa pinal nga 46 segundos apan si Luke Kornet mihansak sa bola gikan sa maanindot nga pasa ni Brown aron pagpalabaw sa Celtics sa hingpit.

Si Derrick White mitapos uban ang 21 puntos samtang si Kornet midugang og 20 puntos alang sa Celtics nga mipayaka sa Raptors sa tulo ka duwa nila ning season.

Bisan og wala ang duha nila ka bitoon nga sila si Jayson Tatum ug Kristaps Porzingis, ang Celtics mikadlit gihapon sa ikalima nilang sunod-sunod nga daog ug ika-10 sa kinatibuk-an sa miagi nilang 11 ka duwa.

Si Barnes mihapos og 30 puntos samtang si Pascal Siakam mi-iskor og 28 puntos sa pilderong Raptors.