Cebu Grand Prix nag-una na sa Donling Cup 2024
CEBU, Philippines — Nagsolo na karon sa unang dapit sa standing ang Cebu Grand Prix human nidaog batok sa Bucket Blazers, 83-55 sa nagkainit nga aksyon sa Donling Cup 2024 niadtong Domingo diha sa Ateneo de Cebu old campus sa Mango Avenue, Cebu City.
Ang Cebu Grand Prix ni Errol Mendoza nagbitbit karon og 5-1 nga baraha, samtang ang Bucket Blazers ni Chyrus Blen wala pa'y daog sa lima ka duwa sa maong liga nga gipadagan sa Brothers Ball League ubos sa liderato ni Marvin Sillar. Si Nash Parame ang gitahod nga player human niya giyahi ang Cebu Grand Prix pinaagi sa iyang 25 puntos, walo ka rebounds ug upat ka assists. Nakatampo sab og daku sa kadaogan si Roldan Daug nga miratsada'g 22 puntos, ingon man si Angelo Ponce nga dunay 16 puntos.
Tulo sab ka players sa nangiwit nga Bucket Blazers ang miiskor og double figures ubos sa pagpangulo ni Jumel Batal nga miburak og 20 puntos, gisundan ni Bernie Bryle Da o nga dunay 14 puntos ug AJ Geronca sa iyang 10 puntos.
Sa sayo pa, ang Donling Aircon and Refrigeration Services mirehistro sa ilang ikaupat nga daog pinaagi sab sa paglubong sa Bert Enterprises, 74-55.
Gipangulohan ang daog sa best player niining si James Carl Lumoya sa iyang 17 puntos, lima ka rebounds ug pito ka assists.
Namuntos sab og maayo si Jessie Sanchez nga dunay 15 puntos, ingon man sila si Michael Adolfo ug Winsley Oftana nga parehong mitampo'g 10 puntos alang sa Donling (4-1) ni Don Quilaton.
Ang Bert Enterprises (1-4) ni Gilbert Sabal gipangulohan ni Charlee Lumasag nga mipabuhagay og 28 puntos, gisundan ni Louejay Abatayo sa iyang 17 puntos.
- Latest
