GSI nidaog gyud batok New Era sa Donling Cup

CEBU, Philippines —  Munasginhawang nidaog ang Goutsource Solution International (GSI) batok sa New Era sa ilang duwa sa Donling Cup 2024 sa miaging gabii diha sa Ateneo de Cebu old campus sa Mango Avenue, Cebu City.

Biya'g otso puntos ang GSI, 50-58 sa nahabiling 6:56 sa fourth quarter, ug sa tanto nilang paningkamot ilang natabla ang iskor, 72-all sa katapusang 20 segundos. Nakawat sa GSI ang momentum kortesiya ni Rheymond Openia sa iyang krusyal nga itsa gikan sa baseline, 74-72. Ang New Era may purohan untang maka-overtime, apan wala mitugot ang kahigayonan kay wala masulod ang drive ni John Ray Formentera dayon kapupos sa oras.

Si VM Cempron nga maoy best player ang nangu sa GSI sa iyang game-high 29 puntos uban ang walo ka rebounds ug upat ka assists. Si Dan Cardenas miamot og 20 puntos alang sa GSI ni Ivan Llesol nga duna na'y 4-1 nga baraha.

Ang 1-4 nga New Era ni Chris Ivan Batitay gipangulohan ni JR Formentera sa iyang 28 puntos, gisundan ni Bryan Yagonia nga dunay 15 puntos. Sila si Kirby Ritada ug Klent Mark Daug miiskor sab og double figures sa pilderong koponan.

Sa unang duwa, ang JMD Automotive mikulit sab og 4-1 record pinaagi sa pagpilde sa Gavens Water Refilling Station, 66-55. Gipangulohan kini sa best player nga si Alain Tarona sa iyang 20 points, 10 rebounds ug six assists, samtang silang Aries Lagunilla ug Jerico Rosales nagtampohay'g 10 puntos sa JMD ni Gerald Dilao.

Miiskor sab og 20 puntos si Justine Sembrano aron mangulo sa Gavens Water ni Kevin Mamac. Si Ryan Mamac miamot og 15 puntos ug si Scott Kier Alindajao mitampo'g 14 puntos sa Gavens nga wala pa'y daog sa lima ka duwa ning maong liga nga giorganisar sa Brothers Ball League ubos sa sa pagpangulo ni Marvin Sillar.

Nidaog sab ang JLT Sorbeteros batok CJL Sniper, 59-46 ubos sa pagpangulo sa best player nga si Charly Ocanada, kinsa mitimbre'g 16 puntos, pito ka rebounds ug unom ka assists, samtang si Jeffrey Francisco mitimang og 12 puntos sa team ni Jack Leonard Tagacanao. Ang napildeng CJL ni James Lapinig gipangulohan sab ni Nico Cojo sa iyang 19 puntos.