Coach Gary mapasalamaton sa pamilya nilang Visayanian

CEBU, Philippines — Ang head coach sa University of the Visayas Green Lancers nga si Gary Cortes mipadayag sa mainiton niyang pasalamat ngadto sa pamilya nilang Visayanian nga maoy gikuhaan nila og inspirasyon pagkab-ot sa labing uwahing kalamposan nga ilang natagamtaman sa bag-ohay pang natapos nga 23rd Cebu Schools Athletic Foundation, Inc. (CESAFI) basketball season.

Mas gutom ug mas determinado, ang Lancers mipatikangkang sa University of Cebu (UC) Webmasters, 60-41, sa tinagakay nga duwa sa ilang best-of-three finals aron pagpabilin sa ilang trono isip college division champion tulo ka gabii pa ang milabay didto sa Cebu Coliseum.

Mao kadto ang ikalimang korona sa Lancers sud sa pito ka sagunson nilang pagtaak sa finals ubos sa paggiya ni Cortes sukad niadtong 2015 ug ika-15 sa kinatibuk-an aron sementohon ang ilang pangan isip labing daogon nga koponan sa 23 ka tuig  nga kasaysayan sa liga.

Si Cortes nagkanayon nga dili nila ma-angkon kining tanan kon wala ang komunidad sa UV nga hugtanong nagsuporta ug nagpaluyo kanila.

Tungod niini, si Cortes mapasalamaton kaayo ilawon sa iyang dughan.

"In behalf of the UV Green Lancers Team, daghan kaayong salamat sa tanan nga dumadapig nga mipadayag sa inyong pag-congratulate sa atong dugang nga kampiyonato ug kadaogan," suwat pa ni Cortes sa iyang Facebook page. "Ang inyong mga palakpak ug mga maanindot nga pulong ang nakapaikag kanamo sa pagpaningkamot."

"Ug labaw sa tanan, daghan kaayong salamat sa pamilya Gullas. Sa mga team sponsors nga naggahin og pundo nga para igasto sa adlaw-adlaw nga galastuhan, sa kumunidad sa UV, sa tanan magtutudlo, sa mga estudyante ug sa uban nga dumadapig, salamat sa suporta ug pagsalig. Salamat hilabi na sa atong labaw nga makagagahum. Dili ni namo makab-ot kon dili tungod kaninyo."

"Dugang paningkamot ug kalampusan sa umaabot. Hinaut pa unta," dugang pa ni Cortes, nga nagparamdam nga magpabilin sa poder UV og laing usa pa ka tuig.