UV Lancers kampiyon gihapon

CEBU, Philippines — Ang University of the Visayas (UV) Green Lancers mipatikangkang sa University of Cebu (UC) Webmasters, 60-41, sa tinagakay nga duwa sa ilang best-of-three finals aron pagpabiling kampiyon sa college division sa Cebu Schools Athletic Foundation, Inc. (CESAFI) Season 23 Men's Basketball Tournament niadtong Sabado, Disiembre 16, didto sa Cebu Coliseum.

Sila si Finals MVP Kent Ivo Salarda ug Raul Gentallan nagkumbinar og 25 puntos sa dihang ang Lancers milangkat sa ikalima nilang korona sud sa pito ka sagunson nilang pagtaak sa finals sukad niadtong 2015 ubos sa paggiya ni coach Gary Cortes.

Sa kinatibuk-an, ang Lancers mibulsa sa ika-15 nilang tropeyo sa kampiyonato aron pagsemento sa ilang pangan isip labing daogan nga koponan sa 23 ka tuig nga kasaysayan sa liga.

"I consider this victory as the sweetest ilabi na kay naunhan mi sa series," matud pa ni coach Cortes. "Our character, our never-say-die spirit bring us to this championship. We have no star complex in our team. Usa among lakaw, usa among tumong."

 "As for UC, they're a fighter. It's just so happen nga wala ma-igo ang ila mga shots mao to ni-take advantage mi especially in the third quarter," dugang pa ni Cortes.

Nindot ang sinugdanan sa Lancers diin sila mi-establisar og sayong 15-5 nga labaw apan sa hinahinay nakagukod ang Webmasters hangtud nga nakasikit ngadto na lang sa dos puntos, 31-33, sa nakaon nga tres minutos pa lamang sa ikatulong kuwarter.

Apan mao na diay kadto ang katapusang hunat sa Webmasters gumikan kay ang Lancers sa kalit lang mitagak og 12-0 nga bomba aron paburoton ang ilang labaw ngadto sa 45-31.

Ang Lancers padayong mibugwak og kayo dayon na ngadto sa pagposte sa kinadak-an nilang labaw nga 19 puntos, 60-41, sa nahibilin nga 1:32 sa duwa nga mao sab ang nahimong pinal nga iskor.