JLT Sorbeteros, CJL Sniper daog na sab sa Donling Cup
CEBU, Philippines — Nahilis ang usa ka dosenang labaw sa JLT Sorbeteros sa first quarter, apan nidaog ra usab gihapon kini'g 12 puntos paghuman sa duwa.
Ang JLT Sorbeteros mipilde sa Bert Enterprises, 58-46 sa Donling Cup 2024 niadtong Domingo diha sa Ateneo de Cebu old campus sa Mango Avenue, Cebu City.
Labaw ang JLT sa sayong bahin sa first period, 12-0 apan gihinay-hinayan kini'g kitkit sa Bert Enterprises hangtod nga nakaigwalis, 37-all sa third quarter. Sa kombinasyon nilang JJ Vestra, Joshua Banaag ug Alex Barcoso, ang JLT nakarekober ug ilang namintinar ang labaw dayon na pagkulit og 12 puntos nga kadaogan.
Si Vestra ang topscorer ug best player sa 3-2 nga JLT pinaagi sa iyang 18 puntos, lima ka rebounds ug unom ka assists, samtang sila si Banaag ug Barcoso adunay siyete puntos matag usa alang sa team ni Jack Leonard Tagacanao.
Nangu sa undermanned nga Bert Enterprises mao si Charlee Lumasag nga mipabuto'g 22 puntos, gisundan ni Loujay Abatayo nga mikadlit og 16 puntos ug si Francis Bauntad mitimbre'g 10 puntos sa team ni Gilbert Sabal nga dunay 1-3 record.
Sa pasiunang duwa, ang CJL Sniper miiskor na sab og laing daog ning higayona batok sa gidaog-daog nga Bucket Blazers, 60-54.
Gipangulohan kini sa best player niining si Jade Nepomuceno sa iyang 15 puntos, lima ka rebounds ug unom ka assists. Ang CJL Sniper ni James Lapinig nakakuha sab og igong suporta gikan nilang Ronald Vargas, Michael Tan ug Niko Cojo nga parehong miiskor og double figures alang sa ilang 3-1 nga baraha.Si Hanz Alemania nga dunay 11 puntos mao lang ang mitali'g double figures sa Bucket Blazers ni Chyrus Blen nga pabiling wa'y daog sa upat ka duwa ning maong liga nga gipadagan sa Brothers Ball League ubos sa pagpangulo sa presidente nilang si Marvin Sillar.
- Latest
