New Era nidaog na gyud sa Donling Cup
CEBU, Philippines — Nakatagamtam na gyud og daog sa upat ka pagsulay ang New Era human makaipsot batok sa Gavens Water Refilling Station, 55-54 sa nagpadayong Donling Cup 2024 sa miaging gabii diha sa Ateneo de Cebu old campus sa Mango Avenue, Cebu City. Mibida sa kadaogan mao si Kirby Ritada, kansang 3-point shot sa nahabiling 1:15 minutos nakapabuhi sa dugo sa New Era, 53-52. Nakuha'g balik sa Gavens Water ang momentum pinaagi sa fastbreak ni Scott Kier Alindajao, apan gisuklian sab kini og dos puntos ni Glen Ventolero nga maoy miselyo sa daog. Gumikan niini, si Ventolero ang nahimong best player of the game nga nihagpat og 16 puntos uban ang siyam ka rebounds ug lima ka assists.
Si Ritada ug si John Ray Formentera parehong mitampo'g 10 puntos sa New Era ni Chris Ivan Batitay. Ang Gavens Water gipangulohan ni Alindajao sa iyang 24 puntos, gisundan ni Eric Sanchez nga dunay 14 puntos. Ang Gavens Water ni Kevin Mamac bokya pa gihapon sa upat ka duwa ning maong liga nga giorganisar sa Brothers Ball League ubos sa liderato ni Marvin Sillar. Sa sayo pa, ang Cebu Grand Prix midaog sab sa kulbahinam nga duwa batok JMD Automotive, 66-62.
Ang kombinasyon nilang Lucky Mendoza ug Roldan Daug maoy nakabuling sa limpyong rekord sa JMD dihang sila ang nangu sa rally human nagtabla ang iskor, 55- all sa katapusang 4:32 minutos sa fourth quarter dayon na pagkulit og daog. Hinuon, si Mendoza ang best player of the game pinaagi sa iyang 25 points, 6 rebounds ug 5 assists, samtang si Daug miamot og 19 puntos sa team ni Errol Mendoza ug sama sa ilang biktima parehong nagbitbit og 4-1 win-loss records.
Ang JMD ni Gerald Dilao gipangulohan ni Dexter Maru nga mikadlit og 17 puntos, gisundan ni Alain Tarona sa iyang 12 puntos, sila si Mark Tanginan ug Jerico Rosales nag-amotay'g 10 puntos.
- Latest
