1st CABC Boysen Cup mosikad na

CEBU, Philippines —  Ang labing unang Cebu Architects Basketball Club (CABC) Boysen Cup mo-arangkada na karong adlawa didto sa Benedicto College-Cebu City Campus gym.

Unom ka teams ang magbugno alang sa korona ning duha ka bulan nga torneyo nga gipaluyohan sa Boysen pinaagi sa marketing executive nilang si Miggy Aparri.

Kini mao ang Boysen Permacoat, Boysen Knoxout, Konstrukt, Nation Paints, Virtuoso Silk Touch, ug Titan Superflex Elastomeric Paint.   

Moduwa sila og single round robin sa eliminasyon.

Ang top 4 mo-abante ngadto sa semifinals diin ang nag-unang duha ka koponan magabaton og twice-to-beat advantage sa ilang mga kaatbang.

Ang mga mananaog maoy mag-abot sa kampiyonato,

Ang University of the Philippines (UP)-Cebu Fighting Maroons, Cebu Institute of Technology-University (CIT-U) Wildcats, ug Felipe R. Verallo Foundation College (FRVFC) Blue Dragons naghinaut nga modimdim sa katam-is sa kadaogan sa Cebu Schools Athletic Foundation, Inc. (CESAFI) Season 23 Men's Basketball Tournament karong adlawa didto sa Cebu Coliseum.

Makigharong ang UP-Cebu batok sa Southwestern University (SWU)-Phinma Cobras sa main game sa alas-5 sa hapon human sa sangka tali sa Wildcats ug Blue Dragons nga gikatakda sa alas 3:30 sa hapon.

Ang Fighting Maroons nanghinaut nga pakgangon ang upat ka sunod-sunod nilang malas, samtang ang Cobras naglaraw sa ikaduha nilang daog sud sa upat ka duwa.

Sa laing bahin, ang Wildcats ug Blue Dragons parehong bokya human sa tulo ka duwa.

Sa juniors division, ang Cebu Eastern College (CEC) Blue Dragons mosuway pagkadlit og laing duha ka sagunson nga daog sa dihang ilang banggaon ang Baby Wildcats sa alas-2 sa hapon.

Ang CEC ikaupat karon sa standings bitbit ang 3-1 rekord samtang ang Baby Wildcats nagkupot og 1-1 nga baraha.

Sa pasiunang aksiyon sa alas 12:30 sa hapon, ang Don Bosco Technical College (DBTC) Greywolves ug University of San Carlos (USC) Baby Warriors mag-abot sa usa ka duwelo tali sa wala pay daog nga mga koponan. Ang duha nangahagba sa nag-una nilang upat ka duwa.