Garing kampiyon sa senior ug midget B sa 12th Alegado Cup
CEBU, Philippines — Human nanghawod sa SK category B, ang Team Garing mibira og dugang duha ka korona sa 12th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Kini human ang Garing milugwa nga kampiyon sa senior ug midget category B. Ang Garing mibugha sa Polog, 71-55, aron paglansang og back-to-back titles sa senior category B.
Si Clark Comiso maoy nangu sa Garing uban ang 16 puntos samtang si Ramesis Luperte miamot og 10 puntos.
Kontrolado kaayo sa Garing ang duwa sukad sila miposte og sayong 22-10 nga labaw, nga ilang gipaburot ngadto sa 21 puntos,58-37, human sa tulo ka kuwarter.
Nadoble ang selebrasyon sa mga pambato sa Garing gumikan kay sila man sab ang naghari sa midget category B.
Ang torneyo ubos sa superbisyon ni Federation President Carlos Donn Flores, nga maoy overall sports chairman, inabagan sa iyang co-chair nga si konsehal Marilou Casul.
Si Paul Alelu Flores ang nagsilbeng league commissioner samtang sila si Lee Mhar Dahil, Agvin Jugan, ug Cromwell Cuenca mga deputy commissioners ug si Stephen Ababon ang hepe sa technical committee.
- Latest
