Duna pay paglaum

Gilas, Italy magtinagakay karon sa Big Dome

CEBU, Philippines — Bokya pa gihapon human sa duha ka duwa, ang Gilas Pilipinas duna pay nipis kaayong tsansa nga makasud sa ikaduhang hugna sa 19th FIBA World Cup.

Apan lain na sab kining higanteng misyon nga sagubangon sa Nationals gumikan kay gikinahan nilang pildihon ang world No.10 Italy og dili mominus 15 puntos ug sa susamang higayon mag-ampo nga ang Angola mapilde sa sunod nilang duwa batok sa Dominican Republic.

Og dili lamang kay kana ra. Ilang banggagon ang gamhanang European team nga manglimbasog sab aron maka-angkon pa og laing kinabuhi.

Tungod niining senaryo, ang mga fans makalantaw sa unahan sa usa ka hugtanong pinaksitay sa dihang ang Gilas ug Italy mag-abot sa tinagakay nga duwa karong alas-8 sa gabii didto sa Smart Araneta Coliseum sa Quezon City.

Ang Gilas nakatilaw og makabuak sa dughan nga kapildihan sa ikaduhang sunod-sunod nga higayon human sila gibalhiboan sa Angola, 70-80, niadtong Dominggo sa gabii didto sa makasaysayanong Big Dome.

Mi-abante pa unta ang mga Pinoy og 11 puntos, 28-17, sa sayong bahin sa ikaduhang kuwarter apan mikolapso atubangan sa mabagsik nga resbak sa Angola, 21-5.

Ang Gilas biya lamang unta og kuwatro puntos, 54-58, apan ang Angola mitagak og 15-3 nga bomba aron pagposte sa kinadak-an nilang labaw nga 16 puntos, 73-57, sa nahibilin nga kuwatro minutos sa duwa.

Nadasig sa mainit nga abiba sa bagang panon sa ilang mga dumadapig, ang Gilas nakasikit ngadto na lang sa singko puntos, 68-73, apan mao na kadto ang katapusan nilang utong human si Gerson Domingos milansang og krusyal nga 3-pointer sa pinal nga 47 segundos ug dayon si Bruno Fernando mihansak sa bola aron silyohan ang daog sa mga bisitang South Africans.

Bisan og natagak sa lawom nga kawot, wala pa nahanaw ang tanan alang sa Gilas.

Nadan-agan pa og paglaum ang mga pambato sa nasud sa ilang laraw nga makatilang sa sunod nga bahin sa prestihoyosong torneyo nga mahitabo kausa lamang sud sa upat ka tuig human ang mga Italyano nakatilaw og makapakurat nga kapildihan sa mga kamot sa Dominican Republic, 81-86.