Donling, AJM daog dayon sa Ranny Colansi Cup 2023
CEBU, Philippines — Nahimo dayong bayani si Jessie Sanchez dihang iyang giluwas ang Donling Aircon Refrigeration Services gikan sa agresibong Gootsource Solution International (GSI), 62-60 pagsugod sa Ranny Colansi Cup 2023 sa miaging adlaw diha sa Ateneo de Cebu, Mango Avenue, Cebu City.
Igwalis ang iskor, 60-all sa nahabiling 23 segundos ug ang GSI may purohan untang modaog o mopwersa sa duwa sa overtime dihang ila ang bola, apan nakawat kini ni Andri Ravina ug nakuha ni Sanchez human nag-ilogay ug miitsa gikan sa baseline aron hatagan ang Donling og 62-60 nga bentaha.
Si Angelo Ponce nga maoy best player ang nangu sa daog sa iyang 15 puntos ug upat ka rebounds, samtang si Roldan Daug miamot og 12 puntos sa team ni Romeo Quilaton Jr.
Nangulo sa GSI ni Ivan Llesol mao si Ernie Inocencio sa iyang 17 puntos, gisundan ni Geory Apas nga dunay 11 puntos ug VM Cempron sa iyang 10 puntos.
Sa first game, ang Ate Jhesscan Mananahi (AJM) milaslas sa JMD Automotive, 50-43 aron lihian sab og daog ning maong liga nga giorganisar sa Brothers Ball League ubos sa liderato ni Marvin Sillar.
Ang best player nga si Rheymond Opena ang nangu sa AJM sa iyang 13 puntos ug pito ka rebounds. Sila si Brixter Villarias ug Nash Parame nagkumboya'g 21 puntos ni team ni Jessica Caneda.
Sila si Roel Villaganas ug Lucky Mendoza mitimbre'g 12 ug 11 sa napilding JMD ni Gerald Dilao.
- Latest
