Tagaytay City nakikilalang sports hub

Unti-unti nang nakilala ang Tagaytay City bilang national sports hub mula sa pagiging world-famous tourist destination.

Ito ay matapos pamu­nuan ni Philippine Olympic Committee (POC) president Abraham “Bambol” Tolentino ang inauguration ceremony para sa Tagaytay City Combat Center kahapon.

“I am happy to announce that, I think, we’re the first LGU (local go­vernment unit) to have a facility like this one,” wika ni Tolentino na pinuno rin ng PhilCycling.

Ang dating Tagaytay City multi-purpose arena ay pinaganda at inayos para maging isang combat center na pagdarausan ng mga martial arts kasama ng taekwondo, karate, jiu-jitsu, kickboxing, vovinam, boxing, arnis, wrestling, muay at iba pa.

Ang dome-shaped faci-lity sa Crisanto M. de los Reyes Avenue ay kadikit ng Tagaytay City BMX Park kung saan isinagawa ang nakaraang Asian BMX Racing and Freestyle Championships at ang Skateboard Park na parehong international-standard facilities.

Nakasama ni Tolentino sa inagurasyon ang mga national combat sports athletes na nanalo ng medalya sa nakaraang 32nd SEAG sa Cambodia at nagpakitang-gilas sa isang demonstration ng kanilang mga sport.

Sinamahan naman ni Philippine Sports Commissioner Edward Hayco, kumatawan kay PSC chairman Richard “Dickie” Bachmann, si Tolentino para sa ribbon-cutting ceremony.

Dumalo rin sa seremonya sina Cavite Vice Governor Athena Tolentino, Tagaytay City Vice Mayor Agnes Tolentino, DMD, Alvin Aguilar (president, wrestling), Jose Malonzo (secretary-general, Vovinam), Alexander Sulit (president, judo), Tongson Rene (secretary-general, arnis), Ferdie Agustin (president, jiu-jitsu) at Atty. Wharton Chan (secretary-general, kickboxing).

Ang Tagaytay City, sa pamamagitan ni Tolentino, ang regular na pinagdarausan ng mga national at international chess tournaments at mga cycling competitions kagaya ng 2019 Southeast Asian Games dahil sa technical terrain nito tampok ang Taal Volcano at Lake bilang backdrop.

“Tagaytay will not only be known as the country’s cycling hub, but also the country’s combat sports capital,” ani Tolentino na inihayag din ang pagpapatayo ng unang indoor at wooden velodrome matapos ang combat center.

Sinabi pa ng POC chief na magpapatayo rin ng athletes dormitory at hotel sa parehong lugar na kilalang Tagaytay City Atrium.