Lerasan mobalik sa Thailand

CEBU, Philippines — Mobalik og saka sa ring ang kanhi world-ranked boxer nga si Adrian Lerasan (12-5, 5 KO's) batok sa Indian fighter nga si Sidhant Lakhera (3-1, 1 KO) sa Highland Boxing Show karong Hulyo 27 sa Spaceplus Bangkok, RCA Plaza sa Thailand nga giulohan "Way of the Champions: Clash of Titans."

Mao kini ang unang pabalik ni Lerasan human siya na knockout sa ikalimang round sa iyang  hard-hitting world-title challenger nga si Ricardo Malajika (11-2, 9 KO's) niadtong nakalabay nga bulan sa Marso didto sa South Africa.

Si Lerasan, 24, dili na bagito sa ibabaw sa ring diha sa Thailand, tungod kay makaupat ka higayon na siyang nakigsangka batok sa mga Thai diha sa maong nasud, silang tanan iyahang gipukan atubangan sa ilang mga kababayan matud pa sa report sa Philboxing.com.

Kaning subli ning pagbalik sa Thailand posibleng maoy iyang ikalimang kadaugan kun siya maoy mogawas nga mananaog batok sa Indian fighter nga wala kaayo mailhi sa kalibotan sa boksing .

Si Sidhant nga mas bata og usa ka tuig kang Lerasan una pang higayong nga makataak sa Thailand ug una sab niyang higayon nga makigsangka sa gawas sa India

Walay nakataya nga bakus o titulo sa sangka sa duha ubos sa Super Bantamweight division. — IBM