No. 23 ibalik ni Lebron

CEBU, Philippines — Dili lang mobalik sa pagduwa sa NBA sa sunod nga season si LeBron James, balikon sab niya og gamit ang iyang orihinal nga jersey number ang 23.

Mao na kini ang ika- 21 nga season ni James sa NBA.  Ang Los Angeles Lakers maoy mibutyag niini pinaagi sa Twitter diin gipakita si James nga nagtalikod suot ang gold jersey nga dunay numero nga 23.

Naanad na si James nga puli-pulihon og gamit ang No. 23 ug No. 6 sugod sa iyang pagkasulod sa NBA niadtong 2003 diha sa Cleveland Cavaliers.

Nagdala siya sa No. 6  sa dihang nahimo siyang NBA’s career scoring leader sa miaging season, ang maong numero gi-retiro na sa liga o dili na mahimong gamiton ni bisan kinsa nilang players agi og pagtahod sa mitaliwang si  Boston Celtics Hall of Famer Bill Russell.

Matud pa sa agent ni James nga si Rich Paul sa ESPN, nakadesider si James pagbalik sa numero 23 agi og pagrespeto kang Russell.

Tungatunga sa miaging semana sa dihang gianunsyo ni James nga moduwa pa kini sa sunod nga season atol sa ESPY Awards.