Maquilan hari sa Bantamweight Division sa PBF
CEBU, Philippines — Naghari sa Philippine Boxing Federation bantamweight sa bag-ohay lang nahuman nga Manny Pacquiao Presents Blow By Blow sa Batasan Hills sa Quezon City si Noli James Maquilan human niya gipatikangkang si Perjohn Alipio sa ikawalong round.
Si Maquilan nga nagrepresentar sa bantogang Peñalosa Boxing Club sa Libis midabo-dabo dayon ni Alipio sa pagsugod palang sa round hangtud nga nakapalusot kini og makabungog nga right straight sa apapangig ni Alipio.
Natikangkang si Alipio sa luna hinungdan nga kini giiphan ni referee Danrex Tapdasan. Bisan nabungog, wala moatras si Alipio ug nakigsinukliay og makusog nga mga kinumo hangtud sa ikalimang rounds.
Apan midominar gihapon si Maquilan batok sa lumad nga taga Iligan City. Usa ka hook sa ikawalong round ang nitugpa sa kilid ni Alipio nga nakapatumba kaniya sa ikaduhang higayon.
Wala na siya makabawi ug naabtan sa ihap sa referee.
“That was a show of force by Maquilan,” matud pang Blow By Blow presenter ug eight-division legend Manny Pacquiao.
“There’s no stopping us from fulfilling our commitment to the Filipino boxers,” matud pang Pacquiao.
Ang kadaugan ni Maquilan nakapasaka sa iyang rekord nga 7-1-0 uban sa upat ka knockouts samtang ikaupat na kini nga kaparutan ni Alipio 9-4-1, 4Kos.—IBM
- Latest
