Mga artista mo-compete sa Bohol triathlon karong adlawa

Panglao,Bohol, Philippines — Karong walay ipahigayong Ironman 70.3 sa Cebu nga sagad unta mahitabo sa sunod buwan, duna gihapoy duha ka mga events nga mahitabo sa Bohol, kini ang Sun Life 5150 ug ang Go-For-Gold/Sunrise Sprint.

Mao na kini ang pinakaduol sa Ironman triathlon challenge nga mahimong salmutan sa mga bangiitang triathletes sa nasud ug bisan asang suok sa kalibotan nga nangita og malisod nga matang sa paugnat sa kusog nga naglambigit og lahutay sa lawas ug sa hunahuna.

Ang aksyon magsugod sayo palang sa buntag karong adlawa Hulyo 9, sa Bellevue Resort sa Panglao, Bohol.

Samtang tuod mas duol ra ang distansiya kun itandi sa Ironman 70.3, gipaabot nga lisud sab kini dili lang sa mga lokal nga triathletes kondili apil na pud sa mga langyaw.

Ang 5150 unang gihimo sa Bohol niadtong 2014, apan naputol kini suds a tulo ka tuig tungod sa Covid-19 pandemic.

Apan ning tuiga, ang provincial government sa Bohol ug mga local government units subling mitayhop og kinabuhi sa maong torneyo. Gipasalig nila ug sa mga organizers nga ang edisyon karon dili nila makalimtan.  Ang edisyon karon gihimong kabahin sa kalihokan sa Sandugo Festival nga nabantog sa Bohol.

Silang Sunlife health ambassadors, Piolo Pascual ug Mateo Guidicelli moapil sab sa mga moduwa sa team relay.

Gipaabot sab nga si popstar Sarah Geronimo mosaksi sa lumba agi og pagsuporta sa iyang bana nga si Mateo. Gawas nila, laing mga artista pa usab ang moapil sama nilang showbiz couple, Paul Jake Castillo ug mga Sugbuanong triathletes.

Apil sa mosalmot karon ang nakadaog sa miaging tuig nga silang Satar Salem, Bea Quiambao and Erika Burgos.

Samtang si Go-For-Gold Jeremy Go miingon nga malaumon siyang makadiskubre og bag-ong mga triathlete talents pinaagi sa sprint competition.