Pilipinas kampeyon sa World Cup of Pool
CEBU, Philippines — Nabalik na sab sa Pilipinas ang kampeyonato sa World Cup of Pool nga kataposang nabitbit pabalik sa nasud nilang billiards legends, Efren “Bata” Reyes ug Francisco “Jango” Bustamante human sa malampusong kampanya nilang Johann Chua ug James Aranas.
Puno sa drama ug kulbahinam ang championship game sa duha batok sa powerhouse nga Germany pinaagi nilang Joshua Filler ug Moritz Neuhausen.
Ang panag-abot sa duha ka nasud sa finals ikaduha na kini nahitabo, una kining nahitabo niadtong 2009 World Cup of Pool finals diin migawas nga madaugon ang Pilipinas.
Unang nakasargo ang Germany pinaagi ni Filler, apan nasipyat dayon kini human na scratch ang bola mano, ang mga Pinoy miarangkada dayon aron pagkuha sa unang puntos.
Apan sa ikaduhang rack, nasipyat si Aranas sa nuwebe nga bola maong nalimpyo kini dayon sa Germany. Sa ikatulong rack, nakaabante na sab ang Germany apan sa ikaupat nga sargo, nasipyat si Filler sa pagtago sa bola mano ug diha na nakakita og oportunidad ang mga Pinoy sa pagabante.
Sa ikalimang rack padayon ang pagabante sa mga Pinoy hangtud nga naabot sa 5-2 ang iskor salamat sa mga sipyat sa mga Germans. Napun-an pa gyud kini sa misunod nga duha ka racks 8-2.
Sa ika-11 rack, nakabawos ang Germany apan natutyo ang tira ni Filler nga talagsaon ra kaayong mahitabo maong napasulo ni Aranas ang 6-9 combination shot.
Sa ika-12 rack natutyo sab ang tira sa mga Pinoy maong nakahibawos ang Germany ,9-3, apan layo pa kaayo ang ilang taakon aron makaabot sa tropeyo.
Hinuon gibwenas ang mga Germans sa sunod nga mga racks hangtud nakasikit sila 9-6 sa ika- 15 racks. Nakapasamot kini sa kahinam sa tanan tungod kay duna gyuy purohang maapsan ug mapildi pa ang mga Pinoy.
Naabot pa gyud sa punto nga 9-7 na ang iskor sa duha, labaw pa gihapon ang Pilipinas. Sa final rack para sa mga Pinoy, malampuson nilang natago ang bola maong napugos ang mga Germans sa paghimo og foul sa pamasin nga masipyat sab silang Aranas ug Chua sa ilang tira.
Apan wala kini mahitabo, gihawanan sa mga Pinoy ang lamesa aron paglangkat sa korona. — Gikan sa Philboxing.com, IBM
- Latest
