Bornea napakyas sa iyang misyon

CEBU, Philippines — Napakyas ang Pinoy'ng si Jade Bornea sa una niyang pagsuway nga mamahimong world champion.

Kini human siya gi-TKO ni Fernando Martinez sa Argentina sa ika-11 nga hugna atol sa eksplosibo ug napuno sa aksiyon nga kumbati tali sa duha ka way pildeng mga boksidor kagahapon didto sa The Armory sa Minneapolis, Minnesota.

Tungod niini, si Martinez nagpabiling IBF super flyweight champion, ang titulo nga iyang giilog gikan sa kababayan ni Bornea nga si Jerwin Ancajas niadto lamang miaging tuig.

Si reperi Charlie Fitch miundang sa away sa oras nga 2:29 sa ika-11 nga hugna human si Martinez nakalandig og makusog nga suntok nga nakagisi sa tuong dunggan ni Bornea sa sayong bahin sa ikasiyam nga hugna.

"I definitely saw the injury in the ear," matud pa ni Martinez. "I hit it with a left and it popped, it exploded. I just kept going at the ear and that's what ended this fight."

Si Martinez miinat sa perpekto niyang rekord ngadto sa 16-0 uban ang 9KOs samtang si Bornea natagak sa 18-1 uban ang 12KOs.

"The training camp we had was brutal. It was great," dugang pa ni Martinez. "The stronger fighter won and it was me."

Nindot unta ang pagsinukliay og kumo sa duha ka mga boksidor sa sayong bahin sa duwa.

Apan nausab ang dagan sa inawayan ni Bornea human nabuak ang tuo niyang dunggan ug grabi ang pagsirit sa dugo nga midagayday sa iyang liog human maigo sa solidong suntok ni Martinez sa ikasiyam nga hugna.

Sa dihang gisukna ni Fitch kon mopadayon pa ba siya og away, si Bornea miyango.

Sukad niadto, ang angol ni Bornea mao na ang kanunay nga gi-ataki ug gibiradahan ni Martinez hinungdan nga naaghat si Fitch pag-undang sa away aron ilikay si Bornea sa dugang kadaut.