Warriors buot higtan si Draymond Green

CEBU, Philippines —  Ipabilin sa ilang poder si All-Star foward Draymond Green alang sa sunod nga NBA season.

Mao kini ang prayodidad sa Golden State Warriors ubos sa bag-o nilang general manager nga si Mike Dunleavy Jr.

Mao kini ang gipabuhagay nga mensahe sa Warriors human milugwa ang taho nga isalikway ni Green ang iyang player option alang sa kontrata nga nagkantidad og $27.6 million sunod season aron mamahimong usa ka unrestricted free agent.

Apan matud pa ni Dunleavy nga way plano ang Warriors nga buhian si Green. Mao sab kini ang gideklara ni coach Steve Kerr sa sayo pa.

"We really want Draymond back," dason pa ni Dunleavy. "What he means in terms of this organization and this team, winning at the highest level, we feel like we have to have him. So that's very important."

Ang 33-anyos nga si Green upat ka higayon nahimong NBA All-Star ug gipasidunggan nga NBA Defensive Player of the Year niadtong 2017.

Mi-average siya og 8.5 puntos, 7.2 rebounds, 6.8 assists ug 1.0 steals matag duwa sa miaging season diin ang defending champion Warriors gitagak sa Los Angeles Lakers sa ikaduhang hugna sa playoffs.

Si Dunleavy masaligon gihapon sa tsansa sa Warriors nga mamahimong championship contender bisan og nagka-edaran na ang ilang lineup.

"A lot can be made of all the challenges that are coming our way, whether it be aging roster, the new CBA (collective bargaining agreement) with some of the limitations there, anything else you can bring up," padayag pa ni Dunleavy.

"We're aware of all those things but we also feel like we're in a great place because we've got a competitive owner willing to spend, a group that's tied in, has good synergy, good processes, sound decision making we feel confident we can navigate it."

Ang Warriors migasto og kinatibuk-ang $346 million sa ilang kampanya sa miaging season apil na niini ang suweldo sa ilang mga players ug luxury tax payouts.