Ginebra, TNT 2-1 ang tirada

CEBU, Philippines — Buk-on sa Barangay Ginebra Kings ug TNT Tropang Giga ang ilang panagtabla sa dihang magsangka na sab sila sa Game 3 sa ilang best-of-seven PBA Governors' Cup Finals karong adlawa didto sa Smart Araneta Coliseum.

Magsugod ang ilang kumbati sa alas 5:45 sa hapon.

Ang Ginebra ni coach Tim Cone maoy nakauna sa serye sa iskor nga 102-90 apan dali nga miresbak ang TNT sa Game 2, 95-82, niadtong Miyerkules sa gabii.

"Sabi namin sa sarili namin tapos na iyong Game 1. Kinalimutan na namin iyon," matud pa ni Calvin Oftana nga usa sa mga mibida sa kadaogan sa TNT.

Gawas ni Oftana nga mihipos og 14 puntos, sila si Mikee Williams, RR Pogoy, Glenn Khobuntin ug Jayson Castro mihimo sab og kasikas sa pagpanimawos sa Tropang Giga batok sa Kings.

Ang labing hayag hinoon nga bitoon sa TNT mao ang ilang import nga si Rondae Hollis-Jefferson nga hapit mokadlit og triple-double uban ang 23 puntos, 19 ka rebounds ug siyam ka assists.

Si Williams miposa og lima ka tres sa iyang 21 puntos samtang ang Sugbuanong si Pogoy milansang og tulo ka 3-pointers sa iyang 17 puntos nga iyang gipalamanan og pito ka rebounds ug tulo ka assists.

Ang Kings nalumpag human namugnaw ang import nilang si Justin Brownlee nga nalimitahan ngadto lamang sa 12 puntos.

Si Christian Standhardinger maoy nangu sa pilderong Ginebra uban ang 29 puntos ug 11 ka rebounds.