‘Redeem Team’ babawiin ang SEAG gold sa Cambodia
MANILA, Philippines — Walang ibang hangad ang Pilipinas kundi ang mabawi ang koronang inagaw ng Indonesia sa darating na 32nd Southeast Asian Games sa Phnom Penh, Cambodia sa Mayo.
Isinumite na ng Samahang Basketbol ng Pilipinas (SBP) ang 28-man national pool para sa Entry By Name (EBN) list sa Philippine Olympic Committee (POC).
Nangunguna sa listahan sina six-time PBA MVP June Mar Fajardo, naturalized guard Justin Brownlee, CJ Perez, Scottie Thompson, Jamie Malonzo, Christian Standhardinger, Roger Pogoy, Mikey Williams at Chris Newsome.
“That moment is upon us, and we’re not leaving any stone unturned in our overall bid to regain basketball glory in our region,” ani SBP president Al Panlilio sa isasabak na “Redeem Team”.
Kasama rin sa pool sina Chris Ross, Marcio Lassiter, Japeth Aguilar, Stanley Pringle, Calvin Oftana, Poy Erram, Raymond Almazan, Aaron Black, Arvin Tolentino, Kevin Alas, Brandon Ganuelas-Rosser, Deschon Winston, Kevin Quiambao, Jerom Lastimosa, Mason Amos, Benjamin Phillips III, Ariel John Edu, Michael Phillips at Jeremiah Gray.
Tinapos ng Indonesia ang 52-game winning streak ng Pilipinas sa SEA Games simula noong 1997 nang manaig sa Hanoi, Vietnam edition.
Tanging sina Fajardo at Pogoy ang natirang miyembro ng 2021 Gilas Pilipinas lineup kasama si coach Chot Reyes na hahawakan rin ang tropa sa FIBA World Cup 2023 sa Agosto 25 hanggang Setyembre 10.
Samantala, target ng Philippine women’s team ni coach Pat Aquino ang ikatlong sunod na SEA Games gold medal.
Nangunguna sa listahan sina Jack Danielle Animam, Afril Bernardino, Stefanie Ann Berberabe, Mikka Cacho, Clare Castro, France Mae Cabinbin, Ana Alicia Katrina Castillo at Camille Izabel Clarin.
Inangkin ng mga Pinay cagers ang gold noong 2019 SEAG sa Manila at muling nagreyna sa Hanoi.
Isinumite rin ng SBP sa POC ang listahan ng men at women 3x3 teams.
Ang men’s 3x3 squad ay gigiyahan ni coach Lester Andrew del Rosario at pamumunuan nina Almond Vosotros, Samboy De Leon, Brandon Bates, Jorey Napoles, Lervin Flores, Joseph Emmanuel Eriobu, Jeffrey Manday, Alfred Ryan Batino, Kakou Ange Frank Kouame at Joseph Sedurifa.
- Latest
