Bulls misungag sa Sixers sud sa duha ka overtime

CEBU, Philippines — Si DeMar DeRozan mi-iskor og 25 puntos sa dihang ang Chicago Bulls nakaipsot sa Philadelphia 76ers sud sa duha ka overtime, 109-105, sa NBA kagahapon didto sa Wells Fargo Center sa Philadelphia, Pennsylvania.

Gawas nga naputol ang walo ka sagunson nilang daog, napakyas sab ang Sixers pagsilyo sa gihandum nilang luna sa playoffs atubangan sa ilang mga fans.

Ikatulo sa Eastern Conference uban ang 48-23 rekord, ang Sixers nanginahanglan na lang og usa ka daog aron hingpit nang makasud sa postseason.

Apan nadelatar ang ilang pagtikang sa playoffs human sila gipakuratan sa Bulls. Kini bisan pa man sa eksplosibong salida ni Joel Embid nga mipatuasik og 37 puntos.

Samtang ang Bulls nagpabilin sa ika-10 nga puwesto sa East bitbit ang 34-37 nga baraha nga nakapahayag sa ilang tsansa nga maka-apil sa play-in tournament.

Sa ubang mga duwa, si Julius Randle mipabuto og 57 puntos apan dili kini kini igo gumikan kay ang New York Knicks nahagba sa mga kamot sa Minnesota Timberwolves, 140-134, ang Sacramento Kings wala matarog sa ikatulong dapit sa West bisan og gibuntog sa Utah Jazz, 128-124, samtang ang Golden State Warriors mipakaging sa Houston Rockets, 121-108.

Sila si Steph Curry ug Klay Thompson nagkumbinar og 59 puntos apil na ang 10 ka tres alang sa Warriors.

Didto sa Memphis, ang Grizzlies milusad og nagkayong opensiba sa katapusang kuwarter aron pakgangon ang Dallas Mavericks, 112-108.

Sa kinatibuk-an, gilubong sa Grizzlies ang Mavs, 29-12, sa pinal nga 12 minutos sa aksiyon.