Pogoy iniligtas ang Tropa sa Magnolia

MANILA, Philippines — Nalampasan ng TNT Tro­pang Giga ang pagba­ngon ng Magnolia mula sa 16-point deficit sa fourth pe­riod para tuhugin ang 93-85 panalo sa 2023 PBA Go­vernors’ Cup kahapon sa Ynares Center sa Antipo­lo City.

Sinandigan ng Tropang Giga si Roger Pogoy sa fi­nal canto para iposte ang 3-1 record at inihulog ang Hotshots sa 0-2 kartada.

Tumapos si Pogoy na may 20 points, 5 rebounds, 3 assists at 3 steals, habang may tig-14 markers si­na import Jalen Hudson, Mikey Williams at Calvin Of­tana para sa TNT na iti­nayo ang 82-66 abante sa pagbungad ng fourth quarter.

Sa pamumuno nina Paul Lee at import Erik Mc­Cree ay nakalapit ang Mag­nolia sa 81-83 sa 4:53 minuto ng laro.

Isang 10-2 atake ang pi­namunuan ni Pogoy para muling itaas ang Tropang Gi­ga sa 93-83 sa huling 1:51 minuto ng sagupaan.

Tumapos si Lee na may 24 points tampok ang anim na triples para sa Hotshots at may tig-12 mar­kers sina McCree at Cal­vin Abueva.

Sa unang laro, humakot si import Cameron Clark ng 31 points at 14 re­bounds sa 122-102 paggi­ba ng San Miguel (3-0) sa Terrafirma (1-2).

Sumosyo ang Beermen sa NLEX Road Warriors sa ikalawang puwesto sa ilalim ng lider na Converge FiberXers.

May 30 points si import Jordan Williams para sa Dyip.