Amit, Centeno nangapakyas sa World 9-Ball Championship

CEBU, Philippines — Ang Sugbuanon nga si Rubelyn Amit ug ang kababayan niining Chezka Centeno parehong nangapakyas sa ilang kampanya sa 2023 Women's World 9-Ball Championship didto sa  Atlantic City, New Jersey.

Si Centeno, nga sa kasamtangan maoy Asian champion, kutob lamang sa quarterfinals human siya gipalagpot ni Allison Fisher, 9-7.

 Nindot unta ang gipakitang labok sa 23-anyos nga si Centeno apan wala siya kaugpo sa beteranong tirada sa 54-anyos nga si Fisher nga kaupat na ma-world champion.

Ang SEA Games gold medalist nga si Centeno mi-abante sa Last 8 human gibuntog si Margaret Fefilova sa Belarus, 9-3.

Gawas ni Fefilova, gipilde sab ni Centeno ang Amerikanang si Dawn Hopkins (7-4) ug si Amit (7-5).

Sa iyang bahin, si Amit wala makaluhatay sa eliminasyon human siya gitagak sa Koreanong si Seoa Sep, 7-3.

 Pait kaayo ang maong kaparotan alang ni Amit, nga mitapos sa ikaduhang puwesto dul-an sa usa ka dekada na ang milabay ug naka-abot sa semis sa miaging edisyon sa prestihiyosong torneyo.

Kaduha ma-world champion sa 10-Ball, ang kalibutanhong korona sa 9-Ball mao nalang ang wala pa matilawi ni Amit sa mabulokon niyang karera.