Lancers kampiyon na sab

Gi-sweep ang Webmasters alang sa ika-14 nga korona sa CESAFI

CEBU, Philippines — Ang University of the Visayas (UV) Green Lancers nag-agi usa og overtime sa wala pa hingpit nga gipatikangkang ang University of Cebu (UC) Webmasters pinaagi sa 79-74 nga desisyon sa kulbahinam nga Game 2 sa ilang best-of-three finals aron paglugwa nga kampiyon sa college division sa 2022 Cebu Schools Athletic Foundation, Inc. (CESAFI) basketball season niadtong Huybes sa gabii didto sa Cebu Coliseum.

Si Ted Saga mikadlit og 18 puntos, si Jiesel Tarossa mi-iskor og 14, samtang si Ivo Salarda midugang og 10 puntos alang sa Lancers, nga misemento sa ilang dungog isip labing daogan nga koponan sa kasaysayan sa CESAFI uban ang 14 na ka korona sukad niadtong 2000.

Ang kalamposan sa UV nahimong mas espesyal alang ni Tarossa gumikan kay siya man maoy gipasidunggan nga regular season MVP. Tungod niini, nagmabungahon ug dili mahikalimtan ang katapusan niyang tuig uban sa Lancers.

"Wa gyud ko mag-expect nga makuha ni nako nga award. Good exit ni para nako ug salamat kaayo sa tibuok namo team nga naningkamod gyud og maayo aron makab-ot ni namo ang championship," matud pa ni Tarossa nga giduyogan sa Mythical Five nilang Saga, Elmer Echavez sa USJ-R Jaguars, Paul Galinato sa Webmasters, ug RR Cauba sa USPF Panthers.

Si UV head coach Gary Cortes naglutaw sab sa panganod sa himaya human gibira ang ikaupat niyang titulo sud sa unom ka sagunson nilang pagtaak sa Finals sukad iyang gidawat ang tahas isip coach sa Lancers niadtong 2015.

"This is the most precious kay ang grabi namo nga naagian gisuklian og tam-is nga kadaogan," dason pa ni Cortes, nga mitukmod og balik sa Lancers ngadto sa trono human ang paghari nila isip grandslam champion gi-undang sa Southwestern Univesity (SWU)-Phinma Cobras niadtong 2019 season pipila lamang ka bulan sa wala pa miulbo ang kalibutanhong pandemiya.

Makapaisa'g balahibo ug makutas ang kumbati tali sa Lancers ug Webmasters nga misangpot nadto sa 64-64 nga panagtabla human sa regulasyon hinungdan sa overtime.

Apan sa dugang singko minutos sa aksiyon, ang Lancers na ang mikontrola sa duwa pinaagi nilang Saga, Salarda ug Zylle Cabellon nga nagtambayayong paglusad og nagkayong 12-4 rally nga nagahatag kanila og 76-68 nga labaw sa pinal nga 51.7 regundos dayon na ngadto sa pagkab-ot og naglagiting nga kalamposan.