CEPCA-CLOSAP Open chessfest karong Disyembre 11
CEBU, Philippines — Ang Cebu Executives and Professionals Chess Association ug ang City of Lapu-Lapu Office for Substance Abuse Prevention nag-alyansa aron pagpahigayon sa CEPCA-CLOSAP:Make A Move Against Drugs Open Chess Tournament karong Disyembre 11 sa Robinsons Galleria Cebu.
Ang CEPCA ubos sa liderato sa presidente niining si Engr. Jerry Maratas ug ang CLOSAP nga gipangulohan sa tsirman niining si Garry B. Lao nagtambayayong luyo sa managsama nilang tinguha nga ilikay ang mga kabatan-onan gikan sa dili maayong mga bisyo sama sa paggamit og ginadiling droga pinaagi sa sports.
"We can also use this event as a platform to spread our drug awareness campaign and advocacies to the community," matud pa ni Garry B. Lao.
Kapin sa usa ka gatos ka mga magduduwa og ahedres ang gipaabot nga mosalmot sa siyam ka hugna nga torneyo nga nagtanyag og P50,000 nga ganting salapi sa mga mananaog.
Ang makampiyon mobulsa og P7,000 samtang ang mopahiluna sa ikaduha ngadto sa ikalimang dapit makadawat og P5,000, P3,000, P2,000 ug P1,500. Ang 6th-10th mokabi og P1,000 matag usa samtang ang maapil sa top 20 dunay konsolasyon nga P500.
Ang mga organizers motunol sab og insentibo ngadto sa top 3 Cepcans (A ug B) ingon man sa top kiddies, female, ug senior nga mga partisipante.
Ang rehistrasyon nagkatidad og P200 sa Cepcans, ladies, kiddies, ug seniors ug P300 sa regular players.
Kadtong interesado moapil gihatagan kutob lamang karong Sabado, Disiembre 10, aron magparehistro. Alang sa duhang detalye, mahimong mokontak ni Cornelo Resma sa 0905-2627262.
- Latest
