Mav's phenomenal nagpanikad molingaw sa mga sugbuanon

CEBU, Philippines — Ang Mav's Phenomenal mipasalig nga hatagan ang mga Sugbuanong fans og usa ka pasundayag nga dili nila mahikalimtan atol sa giatngan nilang exhibition match batok sa Northball Cebu All-Stars nga gikatakda karong Nobiembre 26 didto sa Minglanilla Sports Complex sa Minglanilla, Cebu.

Mismo ang tag-iya ug manedyir sa Mav's Phenomenal nga si Daniel Grospe ang misaad niini atol sa usa ka press conference aron i-promote ang ilang kalihukan ning bag-ohay pa lamang didto sa Kape Kristiano sa Barangay Banilad, dakbayan sa Sugbo. 

Ang Mav's Phenomenal pangulohan nilang Erricson “The Reaper” Gabay, Poypoy Actub, Mavrik Bautista, Richard Velchez, Nem de la Cruz, ug Joshua Roque sa kulbahinam nga aksiyon nga ipahigayon uban sa pagtambayayong sa Minglanilla LGU ubos sa liderato ni mayor Rajiv Enad ug gipaluyohan sa RD Pawnshop pinaagi sa marketing officer niiing si Mike Roma, CSAS ni Ian Callet, VDrink Malunggay ni John Cabahug, ug 032 Kicks by Miller ni Marc Malazarte.

Ang Mav's makigsangka batok sa dekalibreng Northball All-Stars nga pagabidahan ni Dondon Hontiveros isip ilang playing coach.

Mopakita'g aksiyon uban ni Hontiveros sila si JR Quiñahan, Paul Desiderio, Emman Calo, Patrick Jan Cabahug, Barkley Ebona, Shane Menina, Joshua de la Cerna, Lugie Cuyos, JC Escalona, Steve Castro, Wesley Malazarte, ug Keaton Taburnal.

Mopalig-on sa puwersa sa Northball ang duha ka kanhi mga MVP sa CESAFI nga sila si Shaq Imperial ug Jaybie Mantilla.

Mapalit sa pinili nga mga RD Pawnshop branches ug otorisadong Northball outlets, ang mga tickets mapalit sa kantidad nga P150 sa general admission, P250 sa lower box, P400 sa courtside, ug P650 sa VIP section.