Sanchez, Ricafrente misidlak sa Pedal Kings XC Tour
CEBU, Philippines — Sila si Jessie Sanchez ug Danielle Ricafrente maoy nag-una sa listahan sa mga mananaog sa Pedal Kings XC Tour and Fun Ride nga gipahigayon niadtong Dominggo, Oktubre 23, didto sa Jubay, Liloan amihanang bahin sa Sugbo.
Nakampiyon si Sanchez sa 40-above division human gilupig sila si Albert Basirgo ug Roel Taborda samtang sila si Roldan Paschal ug Nick Malon mipahiluna sa ikaupat ug ikalimang dapit.
Sa women's class, si Ricafrente ang mibulsa sa korona human gibuntog sila si Jessa Aguelo ug AJ Talls. Nagkumpleto sa top 5 sila Sandra Rose Costanilla ug Aleya Kate Nombrado.
Mikuha sab og atensiyon si Victor Piongpiong human nanghawod sa 29-39 age group diin sila si Nicho Lumay, Jorice Zabate, Adz Sanchez, ug Jun Duron ang naglangkob sa top 5.
Ang lain pang mga kampiyon mao sila si Aljun Villarin (18-28) ug Khalil Sanchez (17 Under).
Naapil sa top 5 sila si Israel Go, John Paul Dagatan, Jaemeile Paul Holifeña, ug Rovik Khalid
Cartagena sa 18-28 ug sila si Mark Arcilla, Cyril Yrog Irog, Samstill Mamites, ug Earl Ryan Caliposan sa 17 Under.
Giorganisa sa CSAS inabagan sa Team Cobo ug Liloan LGU, ang malampuson nga karera gisalmotan og 324 ka riders gikan sa Bohol, Dumaguete, Moalboal, Badian, Toledo ug uban pang bahin sa Sugbo.
- Latest
