RUS, CK pabiling way pilde
CEBU, Philippines — Padayong nanginit ang Team RUS ug ang CK sa Hoop Nation Arlon Cup Season 2 didto sa City Sports Club-Cebu gym.
Si Feelejo Bongo miwadwad og 21 puntos, unom ka rebounds ug tulo ka assists sa dihang gitumba sa RUS ang Prevention, 65-54, aron inaton ang perpekto nilang record ngadto sa 3-0.
Sa laing bahin, si John Elmer Villabrile mikolekta og 10 puntos, walo ka rebounds ug tulo ka assists sa dihang gilampaso sa CK ang DV Shop, 72-49, alang sa ikaduha nilang sagunson nga daog.
Sa ubang mga duwa, ang Dark Wizard ug Mt. View Village nakalingkawas batok sa ilang mga kontra alang sa ikaduha nilang daog sud sa tulo ka duwa.
Si Ray Gonzaga mihipos og 26 puntos, walo ka rebounds, upat ka assists ug duha ka steals aron pangulohan ang Dark Wizard ngadto sa sikit kaayong 68-67 nga daog batok sa Imperium Event samtang si Marco Sagmon miratasada og 17 puntos, pito ka rebounds, duha ka assists ug usa ka steal aron aswaton ang Mt. View Village ngadto sa 57-53 nga pagpakaging sa Cebu Hoopers.
Sa laing mga resulta, ang Venom, Young Chiefs of Cebu, ug Trojan Warriors mitali sa una nilang daog.
Si Mark Kong mikimada og 11 puntos, walo ka rebounds ug tulo ka assists sa dihang gipaksit sa Venom ang Northy, 59-54, si Kenz Gray Hernandez mirehistro of 12 puntos, unom ka rebounds ug tulo ka assists sa dihang gipaluhod sa Young Chiefs of Cebu ang Sheraf Bistro, 54-50, samtang si Dan-Dan Javellana misumite og 17 puntos, pito ka rebounds, tulo ka assists ug duha ka steals sa dihang gibugha sa Trojan Warriors ang Brothers, 66-54.
- Latest
