11th Alegado Cup: Pulpogan kampiyon gihapon sa SK A

CEBU, Philippines — Gisaw-an nilang Paulo Dalumpines ug Rovello Robles ang dungog sa dihang gipiog sa Pulpogan ang Pitogo, 86-83, alang sa malampuson nilang pagdensa sa ilang SK category A title sa 11th Mayor Teresa "Nene" P. Alegado Cup Fiesta Basketball League didto sa Consolacion, Cebu.

Sila si Dalumpines ug Robles, nga mituboy sa Consolacion Sarok Seavers ngadto sa duha ka sagunson nga kampiyonato sa Pilipinas Super League (PSL) 21 Under division, nagkumboya'g 46 puntos aron tabangan ang Pulpogan pagpanghawod sa susamang dibisyon nga ilang gidominar niadtong 2019 pipilaka bulan wa wala pa miulbo ang kalibutanhong pandemiya.   

Si Jobanie Jumao-as nagparamdam sab uban ang 10 puntos alang sa Pulpogan. Nangu sa Pitogo mao si Froilan Maglasang uban ang 19 puntos samtang sila si James Ethan Maglasang ug Jhonloyd Pepito parehong mitali og 16 puntos sa pilderong kawsa.

Sa sayo pa, ang Casili nakaipsot batok sa Cabangahan, 87-84, aron pagbira niini sa tropeyo alang sa ikatulong dapit.

Si Regner Gonzaga mipupo og 14 puntos samtang sila si Kenrick Alcover ug Melmar Maluya nakatigum og 23 puntos alang sa Casili. Si Adrian Panangin dunay 17 puntos samtang si  Breven Padayogdog midugang og 10 puntos sa naminghoy nga Cabangahan.

Hugtanong gipaluyohan sa Consolacion LGU ubos sa pagpangu ni mayor Teresa "Nene" P. Alegado ug bise vice mayor Rey Damole, ang usa ka bulan nga paugnat sa kusog gituyo aron pagdugang og kasadya sa tinuig na pista sa lungsod karong Oktubre 29 agi'g pagyukbo sa minahal nilang patron nga si San Narciso.

Sa labing unang higayon, si Paul Alelu Flores nagsilbeng overall sports chairman ug league commissioner nga sikit nakigtrabaho nilang konsehal Marilou Casul ug Lalina Villo Yu, ABC President Wesley Alimoren ug SK Federation President Carlos Donn Flores. Sila si coach Lee Mhar Dahil ug Agvin Jugan mitabang pagdapagan sa mga duwa isip deputy commissioners uban ni technical head Louie Cuenca.