Legasiya ni Alvarez nakataya
CEBU, Philippines — Si Saul "Canelo" Alvarez miangkon nga nameligro ang iyang legasiya kon ugaling si Gennady Golovkin maoy modaog sa ikatulo nilang sangka didto sa Las Vegas karong adlawa.
Depensaan sa Meksikanong superstar ang iyang mga super middleweight titles batok sa mainit niyang karibal gikan sa Kazakhstan ug nasayud siya nga ang ikaduhang sagunson nga pilde human sa kapakyasan nga iyang nahiaguman batok ni light heavyweight champion Dmitry Bivol sa miagi niyang away usa ka dakong katalagman.
Mismo si promoter Eddie Hearn ang namahayag nga dili puydeng maparot na sab ang 32-anyos nga si Alvarez gumikan kay seguradong matikayaob ang karera niini.
"If Canelo loses I think he's in a terrible position coming off back to back defeats. He was pound for pound number one, all of a sudden, you probably put him outside of the top 10 if Golovkin wins," dason ni Hearn.
Si Alvarez hinoon maoy inilog ug paborito nga modaog apan dili kini angayan nga mokompiyansa batok sa 40-anyos nga si Golovkin.
Kini tungod kay ang gikaintapang Triple G naglugot-lungot nga makabawos ni Alvarez nga maoy mipatilaw sa labing una niyang pilde atol sa ikaduha nilang panag-abot upat ka tuig na ang milabay.
- Latest
