"Cebully Mania" kasado na karong Dominggo

CEBU, Philippines — Andam na ang tanan alang sa labing unang American Bully dog show dinhi sa Sugbo nga giulohan og "Cebully Mania:Come Out and Play" karong Dominggo, Agosto 28, didto sa IC3 Convention Center.

Gi-sanction sa American Bully Kennel Club (ABKC) nga toa magbase sa Fredericksburg, Virginia, ang makasaysayanong kalihukan gipasiugdahan sa Khalvis Bullies nga gipanag-iya nilang Jason Arquisola ug Dexter Ty inabagan ni Jacques Angelvin Angel isip kabahin sa selebrasyon sa ikaduha ka tuig nilang anibersaryo.

Si Arquisola mao sab ang nag-establisar sa ARQ Sports nga aktibo kaayo sa natad sa boxing ug basketball.

Si Angel nagkanayon nga ang Cebully Mania usa ka competition show nga naglangkob og duha ka kategoriya, ang American Bully ug Exotic Bully.

Mo-judge sa American Bully mao ang duha ka dekalibreng international judges nga sila si Ragim Simone Magh ug Monsorat McField, nga pulos taga Netherlands.

Samtang mo-judge sa Exotic Bully mao ang garbo sa mga Pinoy nga si Doni Alvarez sa Philippine Bully Kennel Club (PBKC).

Gawas sa host Cebu, ang ubang mga partisipante nagagikan sa Manila, Bohol, Iloilo, Dipolog, Butuan, Dumaguete, Davao, ug Zamboanga.

Ang entrance fee nagkantidad og P200 alang sa mga hamtung apan ang mga bata makasud nga libre. Duna say daghang mga raffle prizes ug giveaways.

"The event has a family friendly set-up as we have prepared a playing area for kids. All of these they can enjoy for a fun-filled weekend at Cebully Mania," pasalig pa ni Angel.

Alang sa dugang impormasyon, mahimong mokontak ni Jacques Angelvin Angel sa 0966-1466358 o bisitaha ang Khalvis Bullies Facebook page.