Asawa ni Kobe makadawat $16 million nga danyos

CEBU, Philippines — Ang Los Angeles County pabayron og $31 million nga danyos ngadto sa asawa ni Kobe Bryant ug sa kauban niining reklamante kabahin sa mga graphic photos nga gikuha sa lugar sa helicopter crash nga nakakutlo sa kinabuhi sa NBA superstar ug lain pang walo ka mga tawo kapin sa duha ka tuig na ang milabay.

Gimando kini sa usa ka hukmanan didto sa LA nga maoy midungog sa sensitibong  kaso kagahapong adlawa.

Kahinumduman nga ang mga deputy sa Sheriff ug mga sakop sa kabomberohan didto sa LA County nga miresponde sa eskena sa makalisang nga crash niadtong Enero 2020 mikuha og mga hulagway sa nahitabong aksidente apil na niini ang nangagusbat nga patayng lawas sa LA Lakers legend ug sa 13 anyos niining anak nga si Gianna.

Subay sa dagan sa pagdungog sa kaso, nasuta nga ang mga unang miresponde mipakita sa napitik nilang mga hulagway ngadto sa publiko apil na niini ang usa ka bartender samtang ang usa ka deputy mi-text niini ngadto sa iyang higala samtang nagduwa sila og video games.

Si Vanessa Bryant ug ingon man si Chris Chester, kansang kapikas nga Sarah ug anak nga si Payton namatay sab sa crash, mipasaka og kaso tungod sa nahimo niining kadaut sa emosyonal nga espeto sa ilang kinabuhi. Nabalaka sab sila nga basin mokatap sa internet ang maong mga hulagway sa umaabot.

Human sa pipila ka oras nga deliberasyon, mipabor kanila ang civil jury nga nimando sa LA County nga mobayad og $16 million ngadto ni Vanessa Bryant ug $15 million alang ni Chester.

Si Vanessa Bryant naghilak samtang gibasa ang desisyon ug mibiya kini sa korte nga wala makig-estorya sa nagpaabot nga mga reporters.

Mi-post dayon hinoon siya og hulagway sa iyang Instagram diin makita siya kauban ang milatilawan nilang bana ug anak uban ang caption nga: "All for you! I love you! JUSTICE for Kobe and Gigi!".