032 Kicks, Artera mikumpleto sa semifinalists

CEBU, Philippines — Ang 032 Kicks By Miller ug Artera mitagak sa tagsa-tagsa nila ka mga karibal aron pagkumpleto sa mga semifinalists sa 30-above division sa Amicis Basketball League (ABL) Season 2 didto sa Consolacion National High School (CNHS) gym sa Consolacion, Cebu.

Sila si Jerome Garcia ug Jerome Barrita nagkumboya og 35 puntos sa dihang gipalagpot sa  032 Kicks ang RCBC GAMSI, 63-60.

Ang 032 Kicks abante lamang og sayes puntos human sa tulo ka kuwarter, 47-41, apan miduwa nga kalmado taliwala sa presyur aron pagipsot niinin ngadto sa tres puntos nga kadaogan.

Si Lemuel Malagar mihipos og 15 puntos samtang si Herocris Murallas dunay 10 puntos sa pilderong RCBC.

Sa laing tinagakay nga sangka, si Romar Ponce mipabuto og 27 puntos samtang sila si Warren Canete ug Arnold Quilaton mitali og 15 puntos matag duwa sa dihang gipabakasyon sa Artera ang Miners, 89-82.

Human nakapuwersa og 53-53 nga panagtabla, ang Artera mipakita og igong katakos sa naghinapos nga bahin sa duwa aron pabakwiton ang Miners.

Si Rex Tuazon mikolekta og 20 puntos samtang sila si Alvie Alviola ug Razel Manzera nagkuminar og 32 puntos apan nakawang ang ilang paningkamot sa Miners.