San Remigio Properties milugwa nga kampiyon
CEBU, Philippines — Ang mga pambato sa San Remigio Properties (SRP) maoy milugwa nga labing unang kampiyon sa Cebu 3x3 Streetball nga giulohan og "Engkwentro Tulo2x" ning bag-ohay pa lamang didto sa Fort San Pedro open court.
Gibidahan sa kanhi mga bitoon sa University of the Visayas (UV) Green Lancers nga sila si John Abad, Harold Cortes ug Michael Maestre ug kanhi alas sa Cebu Institute of Technology-University (CIT-U) Wildcats nga si Joshua de Cerna, gibuntog sa SRP ang Team PJEM nilang Fritz Carido, Leonil Terol, Kenneth Fernandez, ug Joe Coral sa final.
Ang SRP ballers mibulsa og P30,000 sa ilang pagsakmit sa titulo samtang ang PJEM nakadawat og P10,000.
Nadoble ang kalipay ni Abad gumikan kay siya man ang gipasidunggan nga Most Valuable Player.
Sa laing bahin, si H. Manuel, nga usa ka responder sa Barangay San Roque, dakbayan sa Sugbo, mikubra og P10,000 human makapasud og half-court shot samtang si Michel Toleran nakap-angkon og P5,000 human gikumpleto ang three-way shot atol sa "ChaseThatBall" side event nga gi-sponsoran ni businessman-sportsman Chase Cokaliong.
Gitukod nilang Lowell Ferrer, Jericho De los Santos ug Ritche Arriba, tuyo sa Cebu 3x3 Streetball ang pagbalik sa kultura sa 3x3 streetball dinhi sa Sugbo pinaagi sa pagpahigayon og regular ug kulbahinam nga mga torneyo.
- Latest
