Doce Pares dunay 7 ka bag-ong Grandmasters
CEBU, Philippines — Ang Doce Pares mainitong midawat sa pito ka bag-ong Grandmasters sa ilang poder.
Kini mao sila si GMs Elmer Mosqueda, Ashley Lee, Abet Cañete, Scott Slezak, Jose Marquez, Felix Roiles, ug Antonio Oñas, Jr.
Sa iyang bahin, si GM Jose Eric Mosqueda gi-promote ngadto sa 10th grade blackbelt.
Si Doce Pares Supreme Grandmaster Arnulfo "Dong" Cuesta maoy nangu sa seremonyas sa pormal nga paghurar sa bag-o nilang mga GMs human sa tradisyonal nilang Grandmasters' Seminar niadtong Hulyo 23 didto sa Juban Garden Resort sa lungsod sa Catmon, amihanang bahin sa Sugbo.
Nagsilbe kining panapos nga aktibidad sa malampusong 16th World Eskrima Kali Arnis Federation (WEKAF) Championships nga gipahigayon niadtong Hulyo 19-22 didto sa Mandaue City Cultural and Sports Complex.
Si Cuesta mi-asumir sa puwesto isip pangulo sa Doce Pares human si SGM Dionisio "Diony" Cañete, ODL (Order of Datu Lapu-Lapu) mipanaw ngadto sa laing kalibutan niadtong Agosto 23 sa miaging tuig.
- Latest
