Luna sa Playoff tuyo sa Ginebra

CEBU, Philippines — Sa ikaduhang duwa sa Barangay Ginebra Kings nga wala ang head coach nilang si Tim Cone, luna sa quarterfinals ang ilang tumong sa dihang ilang sangkaon ang nagkagidlay nga Terrafirma Dyip sa PBA Philippine Cup karong adlawa didto sa Smart Araneta Coliseum.

Bitbit ang 5-1 win-loss record, dili lamang maka-angkon og bahin sa liderato ang Ginebra, segurado na sab silang makasud sa quarterfinals kon ugaling ilang mapilde ang Dyip sa ilang engkuwentro nga gikatakda sa alas-6 sa gabii.

Mao kini ang tahas nga sagubangon ni interim coach Richard del Rosario, nga gidayeg sa iyang mga batos tungod sa maanindot niyang pagdala sa papel ni Cone nga toa karon sa Amerika nagsilbeng assistant coach sa Miami Heat sa NBA Summer League.

Usa sa mga midayeg ni Del Rosario mao ang reigning MVP nga si Scottie Thompson.

"Step up si coach Richard in place of coach Tim, and we're ready to respond," matud pa ni Thompson, nga usa sa mga nangu sa Ginebra ngadto sa 105-89 nga paglampornas sa Converge FiberXers niadtong Biyernes.

Dili hinoon angayan nga mokompiyansa ang Kings gumikan kay gutom kaayo nga modaog ang Dyip ilabi na kay bokya pa gihapon kini human sa unom ka duwa. Sa dili pa mag-abot ang Kings ug ang Dyip, ang Meralco Bolts makigharong batok sa Rain or Shine Elasto Painters sa alas-3 sa hapon.

Ang Bolts nagkupot karon og 3-3 nga baraha samtang ang E-Painters usa pa lamang ang daog nga giatbangan og lima ka pilde.