Kings hari gihapon

CEBU, Philippines — Giinat sa Barangay Ginebra Kings ang ilang dominasyon sa Meralco human hingpit nilang giputlan og linya ang Bolts, 103-92, sa Game 6 sa ilang best-of-seven finals series aron pagpabilin sa ilang trono isip kampiyon sa PBA Governors' Cup niadtong Biyernes sa gabii didto sa Mall of Asia Arena sa Pasay City.

Gihuman sa Gin Kings ang serye sa baraha nga 4-2.

Ang Gin Kings madasigon nga mibangon human maalkansi og 1-2 sa serye pinaagi sa pagharos og daog sa sunod nga tulo ka duwa aron patikangkangon ang Bolts sa ikaupat nga higayon sa Governors' Cup finals.

 Gawas niini, gibuak na sab ni Ginebra coach Tim Cone ang dughan ni Meralco coach Norman Black nga hangtud karon wala pa gihapon makabawos kaniya sa upat nila ka panag-abot sa kampiyonato.

"Barangay, wow! I'm so honored to be part of your family. For many years, I'm not part of your family. Now, I'm part of it, and it's amazing," matud pa ni Cone, nga maoy utok sa ikaupat nga titulo sa Ginebra sa Governors' Cup ug ikaunom sa kinatibuk-an sa miaging unom ka tuig.

Ang residente nilang import nga si Justin Brownlee ug ingon man sila si LA Tenorio, Christian Standhardinger ug Scottie Thompson maoy mipalutaw sa Gin Kings ngadto sa panganod sa himaya.

Si Brownlee impresibong namawi human nalimitahan ngadto lamang sa dos puntos sa first half pinaagi sa pagpabuto og 22 puntos sa second half samtang si Tenorio nagmangtas og maayo aron pagkadlit niini og 30 puntos.

Si Standhardinger mikolekta og double-double nga 19 puntos ug 13 ka rebounds samtang si Thompson mikuha sab og atensiyon uban ang 15 puntos, tulo ka rebounds, tulo ka assists ug tulo sab ka steals.

Gumikan sa ilang kalamposan, ang Ginebra nakatabla sa Alaska Milk ug Magnolia isip ikaduhang winningest ballcubs sa PBA bitbit ang 14 ka korona matag usa.

Samtang si Cone, nga naka-coach sab kanhi sa Alaska ug Magnolia, milangkat sa ika-24 niyang titulo.

"I hope we've brought joy pagkatapos ng pandemic. And I hope there will be more to come," dason pa ni Cone.