Spence mikulata ni Ugas

CEBU, Philippines — Gikastigo ni Errol Spence si Yordenis Ugas dayon na ngadto sa pagrehistro og impresibong kadaogan pinaagi sa 10th round TKO aron sakmiton ang ikatulo niyang bakos isip welterweight world champion kagahapon didto sa AT&T Stadium sa Dallas, Texas.

Gawas nga giinat ang perpekto niyang record ngadto sa 28-0 nga gidayan-dayanan na karon og 22 knockouts, gidugang sab ni Spence ang korona sa WBA ngadto sa iyang WBC ug IBF titles.

Gidabo-dabo na og kulata ni Spence si Ugas hinungdan nga si reperi Laurence Cole naaghat pag-undang sa away sa oras nga 1:44 sa ika-10 nga hugna.

Niadtong tungora, hubag na kaayo ang tuong mata ni Ugas human ma-igo sa mga suntok nga gipauwan ngadto kaniya ni Spence.

Gipabarag ni Spence si Ugas sa ikapitong hugna ug sukad niadto wa nay puas niyang gibiradahan sa mahait niyang kinumo ang nagsalimuang nga Cuban.

Si Spence mi-away sa unang higayon sukad siya mi-atras sa sangka nilang Pinoy ring legend Manny Pacquiao niadtong Agosto sa miaging tuig gumikan kay nakahiagum siya og angol sa iyang mata.

Bangis kaayo si Spence nga milatos ni Ugas sa bagsik ug gamhanan niyang mga kombinasyon.

Human gilangkat ang ikatulo niyang bakus, si Spence wala na mag-usik og panahon aron hagiton ang way pildeng WBO champion nga si Terence Crawford alang sa usa ka unification bout nga modetermina kon kinsa gyud ang tinuoray nga hari sa welterweight division.

“That’s the fight that I want, that’s the fight everybody else wants. Terence, I’m coming for that belt,” padayag pa ni Spence.